Վարչապետ Նիկոլ Փաշինյանն այցելել է Վայոց ձորի մարզ և ծանոթացել 2023 թվականին իրականացված և ներկայումս ընթացքի մեջ գտնվող ծրագրերին:

Նիկոլ Փաշինյանի առաջին կանգառը եղել է Ջերմուկ քաղաքը, որտեղ ծանոթացել է Եղնիկի արձան մոտեցնող ճանապարհի և դիտահրապարակի կառուցման աշխատանքներին: Ծրագրի իրականացման համար Կառավարությունը հատկացրել է ավելի քան 232 մլն դրամ: Արդյունքում՝ կլինի 1,6 կմ բարեկարգ ճանապարհ, դիտահրապարակ, որը կնպաստի համայնքի զբոսաշրջության զարգացմանը: Կատարված է շինարարական աշխատանքների 92 %-ը, ավարտը նախատեսվում է 2025թ.-ին: Ներկայացվել է նաև Ջերմուկ քաղաքի Արփա գետի կիրճի և Ջերմուկի խորհրդանիշ եղնիկի արձան տանող ճանապարհի շրջակա ժայռերի լուսավորության ապահովման սուբվենցիոն ծրագիրը: Ծրագրի ընդհանուր արժեքը կազմել է ավելի քան 34 մլն դրամ, որից 20,6 մլն դրամը հատկացրել է Կառավարությունը։

Հաջորդիվ վարչապետը ծանոթացել է Ջերմուկ քաղաքի Մյասնիկյան փողոցի սկզբնամասում գտնվող Վ. Սարգսյանի անվան զբոսայգում և Ազատամարտիկների պուրակում իրականացված բարեկարգման աշխատանքներին: Սուբվենցիոն ծրագրի ընդհանուր արժեքը կազմել է ավելի քան 74 մլն դրամ, Կառավարությունը հատկացրել է 33 մլն 363 հազար դրամ։

Կառավարության ղեկավարը ծանոթացել է նաև Ջերմուկի Շահումյան փողոցից դեպի ըմպելասրահ տանող ճեմուղու վերանորոգման, բարեկարգման, տաղավարների և տեղեկատվական կենտրոնի կառուցման աշխատանքներին: Ծրագրի ընդհանուր արժեքը 94 մլն դրամ է, որը հատկացրել է Կառավարությունը: Կառուցվել է 20 տաղավար, վերանորոգվել և բարեկարգվել է 180 մ ճեմուղի: Կառուցվել է նաև տեղեկատվական կենտրոն։

Այնուհետև Նիկոլ Փաշինյանին ներկայացրել են Ջերմուկի Շահումյանի, Վ․ Վարդանյանի, Մյասնիկյանի, Մելիք Ադամյանի և Չարենցի փողոցների վերականգնման, բարեկարգման աշխատանքները՝ ընդհանուր 4,1 կմ հատված: Ծրագրի նպատակով Կառավարությունը հատկացրել է 704 մլն դրամ:

Ջերմուկ համայնքում մասնավոր հատվածի կողմից իրականացնում են նաև «Գլաձոր» առողջարանի հիմնանորոգման աշխատանքները: Ներդրումային ծրագրի արժեքը մոտ 7.5 մլրդ դրամ է: Արդյունքում հիմնովին կհիմնվի բարձրակարգ հյուրանոց՝ նախատեսված 200 անձի համար: Աշխատանքների ավարտը նախատեսվում է 2025 թ.-ին:

Վարչապետն այցելել է Ջերմուկի Ազատամարտիկների պուրակ և ծանոթացել այնտեղ իրականացված բարեկարգման աշխատանքներին: Սուբվենցիոն ծրագրի ընդհանուր արժեքը կազմել է ավելի քան 30 մլն դրամ, որից 13,8 մլն դրամը հատկացրել է Կառավարությունը:

Գործադիրի ղեկավարին մանրամասներ են ներկայացվել նաև Ջերմուկի Մաշտոցի փողոցի 2,4 կմ հատվածի բարեկարգման աշխատանքների վերաբերյալ: Ծրագրի արժեքը կազմել է ավելի քան 732 մլն դրամ, որը հատկացրել է Կառավարությունը: Աշխատանքները նախատեսվում է ավարտին հասցնել նոյեմբերին:

Նիկոլ Փաշինյանի հաջորդ կանգառը եղել է Գնդեվանքը, որտեղ քայլարշավային արահետի 1,7 կմ հատվածի բարեկարգման աշխատանքներ են իրականացվում: Ծրագրի ընդհանուր արժեքն ավելի քան 117 մլն դրամ է, աշխատանքները կավարտվեն հաջորդ տարի: Նշվել է նաև, որ բարեկարգված քայլարշավարանը կնպաստի համայնքի զբոսաշրջության զարգացմանը: Միաժամանակ, ընթացքի մեջ են Սբ. Աստվածածին եկեղեցու և որմնանկարների վերականգնման աշխատանքները, որոնք նախաձեռնել է ԿԳՄՍ նախարարությունը:

Վարչապետը ծանոթացել է նաև /Մ-2/ - Հերհեր – Կարմրաշեն միջպետական նշանակության ավտոճանապարհի՝ 8.7 կմ հատվածի հիմնանորոգման աշխատանքներին: Ծրագրի համար Կառավարությունը հատկացրել է 790 մլն 900 հազար դրամ։

Նիկոլ Փաշինյանը եղել է նաև Գոմքի միջնակարգ նորակառույց դպրոցում: 100 աշակերտի համար նախատեսված նոր դպրոցի կառուցման համար Կառավարությունը հատկացրել է ավելի քան 694 մլն դրամ: Դպրոցում կառուցվել է հանդիսությունների սրահ՝ 100 տեղ հզորությամբ և մինի ֆուտբոլի դաշտ:

Վարչապետը շնորհավորել է ներկաներին դպրոցի բացման առիթով և նշել, որ դա Գոմք գյուղի ողջ պատմության ընթացքում կատարված ամենամեծ ներդրումն է, որը կարելի է պատմական իրադարձություն համարել: Նիկոլ Փաշինյանը հանձնարարել է՝ Սահմանամերձ գյուղական բնակավայրերում բնակապահովության 16 մլն դրամի պետական աջակցության ծրագրի երկրորդ փուլի մեկնարկը սկսել Գոմք բնակավայրից: Վարչապետի գնահատմամբ՝ այն պետք է լինի հասցեական և նպաստի  գյուղերի զարգացմանը:

Հաջորդիվ Կառավարության ղեկավարն այցելել է Վայք համայնքի Զառիթափ բնակավայրի մանկապարտեզ, որի առաջին մասնաշենքի հիմնանորոգման սուբվենցիոն ծրագրի արժեքը 64 մլն դրամ է, որից մոտ 45 մլն դրամը հատկացրել է Կառավարությունը: Հիմնանորոգված մանկապարտեզը նախատեսված կլինի 200 սանի համար: Կատարվել է շինարարական աշխատանքների 78 %-ը:

Վայք համայնքի Շահումյան փողոցում ասֆալտապատման սուբվենցիոն ծրագրի ընդհանուր արժեքը կազմել է 396,8 մլն դրամ, որի 45 %-ը կազմել է պետական մասնաբաժինը՝ 187,5 մլն դրամ։ Աշխատանքներն ավարտված են, ասֆալտապատվել է 1850 գծմ ճանապարհ, փոխված են բոլոր ենթակառուցվածքները:

Վարչապետին մանրամասներ են ներկայացվել Վայքի միասնական սոցիալական ծառայության տարածքային կենտրոնի վերանորոգման և վերակառուցման ծրագրի վերաբերյալ: Կենտրոնի վերանորոգման և վերակառուցման աշխատանքների համար Կառավարությունը հատկացրել է 183,7 մլն դրամ:

1,5 մլրդ դրամ է հատկացվել նաև Մ-2/ (Արենի)- Խաչիկ – Գնիշիկ - Եղեգնաձոր միջպետական նշանակության ավտոճանապարհի 12 կմ հատվածի հիմնանորոգման համար:

Նիկոլ Փաշինյանը եղել է Եղեգիս համայնքի Քարագլուխ բնակավայրի մարզամշակութային կենտրոնում, որտեղ բարերարի կողմից իրականացվել են վերանորոգման աշխատանքներ: Իր հերթին Կառավարությունը կենտրոնին հատկացրել է 58 մլն դրամի մարզական գույք:

Հաջորդիվ վարչապետն այցելել է Վայոց ձորի մարզի Հորս գյուղի Չեսար Օրբելյանի 14-րդ ապարանք (Չեսարի դարպաս): Նշվել է, որ 2024 թ․ԿԳՄՍ նախարարության պատվերով (11 մլն դրամ) «Պատմամշակութային արգելոց-թանգարանների և պատմական միջավայրի պահպանության ծառայություն» ՊՈԱԿ-ի հնագիտական արշավախումբն իրականացրել է պեղումներ ապարանքի և հարակից փոքր եկեղեցու տարածքներում։ Նախարարության պատվերով կազմվում է նաև Չեսարի ապարանքի և հարակից փոքր եկեղեցու վերականգնման նախագիծը (մոտ 9.6 մլն դրամ)։ Վերականգնման աշխատանքները նախատեսված են 2026 թվականից։

Կառավարության ղեկավարը ներկա է գտնվել նաև Եղեգիսի դպրոցի նոր շենքի բացման արարողությանը: Ավելի քան 737 մլն դրամ արժողությամբ ծրագրի իրականացման արդյունքում կառուցվել է 100 աշակերտի համար նախատեսված նոր դպրոց, ապաստարան, հանդիսությունների սրահ 100 տեղ հզորությամբ և մինի ֆուտբոլի դաշտ: Նիկոլ Փաշինյանը, դիմելով ներկաներին, նշել է՝ Կառավարությունը ոչ մի գյուղում դպրոց չի փակում, այլ բոլոր գյուղերի համար կառուցում է ժամանակակից պայմաններին համապատասխանող դպրոցներ: Վարչապետն ընդգծել է, որ թեև այս դպրոցը Եղեգիսում է, բայց Եղեգիսը խոշորացված համայնքն է և այլ բնակավայրի երեխաների պատշաճ ուսումնառությունը նույնպես այստեղ կկազմակերպվի: Նշվել է նաև, որ Կառավարությունը կլուծի այլ բնակավայրերից եկող աշակերտների տրանսպորտային խնդիրները:

Վարչապետը նորակառույց դպրոցի աշակերտներին մաղթել է. «Նախ հարստացեք գիտելիքով, հետո այդ գիտելիքի կիրառմամբ հարստացեք և հարստացրեք նաև ձեր պետությունը: Շենքն ընդամենը մի անշունչ առարկա է և դուք եք, որ պետք է ապրեցնեք շենքը, դուք եք, որ պետք է ապրեցնեք միջավայրը, ավելի աշխույժ և ավելի լավ ապրեցնեք համայնքը, մարզը և հանրապետությունը:

Փա՛ռք նահատակներին,
Եվ կեցցե՛ Հայաստանի Հանրապետությունը,
Եվ կեցցե՛ կյանքը, որ պիտի հաղթի և հաղթում է Հայաստանի Հանրապետությունում, և այս շենքը կյանքի հաղթանակի մի շատ կարևոր և մեծ օրինակ է»:

Այնուհետև վարչապետն այցելել է Շատինի միջնակարգ դպրոց: Կառավարությունը 209 մլն 980 հազար դրամ է հատկացրել Շատինի միջնակարգ դպրոցի մարզադահլիճի և հանդիսությունների սրահի վերակառուցման համար: Ծրագրի իրականացման արդյունքում դպրոցն ունի նոր մարզադահլիճ և հանդիսությունների սրահ մինչև 100 աշակերտ/տեղ նախագծային հզորությամբ:

Մ-10, Սևան-Մարտունի-Գետափ միջպետական նշանակության ավտոճանապարհի վրա գտնվող կամրջի հիմնանորոգման աշխատանքները ներկայացնելիս՝ նշվել է, որ իրականացվում են վթարային վիճակում գտնվող կամրջի կրող կոնստրուկցիաների ամրացման և հենապատերի հիմնանորոգման աշխատանքներ։ Ծրագրի իրականացման համար Կառավարությունը հատկացրել է ավելի քան 94 մլն դրամ։ Աշխատանքները կավարտվեն 2025 թվականին:

Արենի համայնքի Արփի բնակավայրում 1-ին փողոցի 700 գծմ հատվածի ասֆալտապատման սուբվենցիոն ծրագրի ընդհանուր արժեքը կազմել է 116.5 մլն դրամ, որից 54,4 մլն դրամը հատկացրել է Կառավարությունը։

Իսկ Արենի համայնքի Աղավնաձոր բնակավայրում 25-րդ փողոցի, 3-րդ փողոցի վերջնամասի և 1-ի փողոց 4-րդ փակուղու ասֆալտապատման աշխատանքների համար Կառավարությունը հատկացրել է սուբվենցիոն ծրագրի ընդհանուր արժեքի 45 %-ը՝ 33 մլն 750 հազար դրամ։ Ծրագրի ընդհանուր արժեքը 75 մլն դրամ է: Արդյունքում՝ բնակավայրում ասֆալտապատվել է 450 գծմ և սալարկված է 180 գծմ ճանապարհ:

Բարեկարգման աշխատանքներ են իրականացվում նաև Արենի համայնքի Արենի բնակավայրի փողոցներում: Ծրագրի շրջանակում իրականացվում են՝ դեպի եկեղեցի- 2811.1 մ², համայնքապետարան-738.6 մ², կամուրջ տանող-1786,96 մ² հատվածների բարեկարգման աշխատանքներ, կենտրոնական խաչմերուկից դեպի մաքրման կայան կոյուղագծի, մաքրման կայանի կառուցման աշխատանքներ: Ծրագրի ընդհանուր արժեքը մոտ 500 մլն դրամ է, միջոցները տրամադրել է Կառավարությունը: Կատարված է շինարարական աշխատանքների 40 %-ը, ավարտը նախատեսված է հաջորդ տարի:

Արենի համայնքի Արենի բնակավայրում «ՋիԷյՋեմ-Արմենիա» զարգացման հիմնադրամը կառուցել է մանկապարտեզ՝ շուրջ 1,3 մլրդ դրամի ներդրմամբ։ Նորակառույց մանկապարտեզը կլինի մինչև 120 սան/տեղ նախագծային հզորությամբ։ Այն կունենա 4 տարիքային և 2 մսուրային խումբ:

Արենի համայնքի Ռինդ բնակավայրում Նիկոլ Փաշինյանն այցելել է Կառավարության աջակցությամբ «Նոա օֆ Արենի» ՍՊԸ-ի կողմից հիմնված 20 հա խաղողի ինտենսիվ այգի: Նշվել է, որ 8 տարիների ընթացքում այգիների և գործարանի հիմնման և ընթացիկ ծախսերի համար ներդրվել է մոտ 3 մլրդ դրամ։ Ընկերությունը շուկայում է իր ՆՈԱ, Արկուռի, Արևունի և ԹԱԹ ապրանքանիշերով այս պահին արտահանում է արտադրանքն ավելի քան տաս երկրներ։ Հիմնական շուկաներն են՝ ՌԴ, Եվրոպա, ԱՄՆ, Բրազիլիա։ Ընկերությունը հիմնադրվել է 2017 թ-ին։ 2017-2018 թթ․ ընկերությունն Արենի համայնքի Ռինդ և Աղավնաձոր գյուղերում գնել է 45 հա խաղողի այգի: Աշխատանքները մեկնարկել են 2019 թ.-ին։ Պետական աջակցման ծրագրի շրջանակում հիմնվել է 20 հա ինտենսիվ խաղողի այգի։ Այս նպատակով տրամադրվել է սուբսիդավորված վարկ՝ 172 մլն դրամի չափով։ 2023 թ.-ից 65 հա այգում խաղողը մշակվում է օրգանիկ եղանակով, 2025 թ․ ավարտին նախատեսվում է օրգանիկ սերտիֆիկատի ստացում։ Պետական աջակցման ծրագրի շրջանակում 65 հա այգում կաթիլային ոռոգման համակարգ ներդնելու նպատակով տրամադրվել է 99 մլն դրամ վարկ, որն այս պահի դրությամբ ամբողջովին մարվել է։

Վարչապետ Փաշինյանի վերջին կանգառը եղել է Արենի համայնքի Ելփին բնակավայրում մանկապարտեզի շենքի կառուցման շինհրապարակը: Սուբվենցիոն ծրագրի ընդհանուր արժեքը 343,4 մլն դրամ է, որի 80 % -ը՝ 274,7 մլն դրամը հատկացրել է Կառավարությունը: Նորակառույց մանկապարտեզ նախատեսված կլինի 60 սանի համար: Ներկայումս կատարվել է աշխատանքների մոտ կեսը, մյուս մասը կիրականացվի մինչ տարեվերջ: